नेपाली सेनाद्वारा बम डिस्पोजल रोबोट खरिद

पुस ७, २०७२- नेपाली सेनाले सडक छेउछाउ भेटिएका बम निष्क्रिय गर्न सक्ने 'बम डिस्पोजल रोबोट' खरिद गरेको छ ।

२०७० चैत २६ मा नेपाली सेनाको आदर्श विकास टोलीले आयोजना गरेको मिलिटरी साइन्स एन्ड टेक्नोलोजी कम्पिटिसनमा प्रथम स्थान हासिल गर्न सफल भएको बम डिस्पोजल रोबोटलाई मिलिटरी भर्सनमा अपग्रेड गरी खरिद गरिएको हो ।

प्रधानसेनापति राजेन्द्र क्षेत्रीको प्रमुख आतिथ्यतामा जंगीअड्डामा मंगलबार एक कार्यक्रमबीच रोबोट निर्माणकर्ता गणेशविक्रम सिंहको टोली र सेनाबीच खरिद सम्झौता भएको सैनिक जनसम्पर्क निर्देशनालयले जनाएको छ ।

कार्यक्रममा टिम लिडर सिंहले रोबोटको साँचो प्रधानसेनापति क्षेत्रीलाई हस्तान्तरण गरेका थिए । यस खरिदबाट नेपाली उत्पादकलाई प्रोत्साहन मिल्नुका साथै सानातिना झाडी/बुट्यान, सडक छेउछाउ तथा घरको भुइँ तल्लामा राखिएका बम सुरक्षित तबरले निष्क्रिय गर्न मद्दत पुग्ने सेनाको विज्ञप्तिमा उल्लेख छ ।

श्रोत - कान्तिपुर समाचार